សេចក្តីប្រកាសព័ត៌មាន លេខ ០០១​៖ លោក ជា ជីវ លោក ថោង សារឿន និងលោក គ្រុយ គឹមសាំង បានយល់ព្រមបង់ប្រាក់ពិន័យរួចហើយ

លោក ជា ជីវ លោក ថោង សារឿន និងលោក គ្រុយ គឹមសាំង បានយល់ព្រមចូលខ្លួនមកបង់ប្រាក់ពិន័យតាមលិខិតបង្គាប់របស់គណៈកម្មាធិការជាតិរៀបចំការបោះឆ្នោត (គ.ជ.ប) រួចហើយ នៅលេខាធិការដ្ឋានរៀបចំការបោះឆ្នោតខេត្តបាត់ដំបង កាលពីថ្ងៃទី១៨ ខែមករា ឆ្នាំ២០១៩ ។

ប្រាក់ដែលត្រូវពិន័យក្នុងម្នាក់ៗ មានដូចខាងក្រោម ៖
-    ឈ្មោះ ជា ជីវ រស់នៅភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង ត្រូវពិន័យជាប្រាក់ចំនួន ១០ លានរៀល។
-    ឈ្មោះ ថោង សារឿន រស់នៅភូមិគាស់ក្រឡ ឃុំគាស់ក្រឡ ស្រុកគាស់ក្រឡ ខេត្តបាត់ដំបង និងឈ្មោះ គ្រុយ គឹមសាំង រស់នៅភូមិដូង ឃុំបឹងរាំង ស្រុកកំរៀង ខេត្តបាត់ដំបង ត្រូវពិន័យជាប្រាក់ក្នុងម្នាក់ៗចំនួន ៥ លានរៀល ។
ប្រាក់ពិន័យទាំងអស់ត្រូវបានបង់តាមរយៈ លោក សួន ចំរើន ដែលជាតំណាងរបស់អ្នកទាំងបី។ ថវិកាសរុប ២០លានរៀលនេះ ត្រូវបង់ចូលជាថវិការបស់រដ្ឋ។

ការបង់ប្រាក់ពិន័យនេះ ធ្វើឡើងតាមអំណាចសេចក្តីសម្រេចបិទផ្លូវតវ៉ា របស់ក្រុមប្រឹក្សាជំនុំជម្រះនៃក្រុមប្រឹក្សាធម្មនុញ្ញ កាលពីថ្ងៃទី១៥ ខែសីហា ឆ្នាំ២០១៨  ដោយតម្កល់សេចក្តីសម្រេចលេខ ០០៩ ចុះថ្ងៃទី០៨ ខែសីហា ឆ្នាំ២០១៨ របស់ក្រុមប្រឹក្សាជំនុំជម្រះ គ.ជ.ប ដែលសមេ្រចផ្តន្ទាទោសបុគ្គលទាំង ៣ រូបខាងលើពីបទ “រារាំងប្រជាពលរដ្ឋដែលមានសិទ្ធិបោះឆ្នោតមិនឱ្យទៅបោះឆ្នោត និងធ្វើឱ្យមានការភាន់ច្រឡំនាំឱ្យបាត់បង់ទំនុកចិត្តលើការបោះឆ្នោត”  តាមមាត្រា ១៤២ នៃច្បាប់ស្តីពីការបោះឆ្នោតជ្រើសតាំងតំណាងរាស្រ្ត ។

សូមរំលឹកផងដែរថា ក្នុងអំឡុងពេលបោះឆ្នោតជ្រើសតាំងតំណាងរាស្រ្ត នីតិកាលទី៦ ឆ្នាំ២០១៨ លោក ជា ជីវ បានផ្តួចផ្តើមគំនិតធ្វើសកម្មភាពជួបជុំមនុស្សជាច្រើន និងថតរូបម្រាមដៃស្អាត។ ក្រោយពីបញ្ចប់ការជួបជុំ លោក ជា ជីវ លោក គ្រុយ គឹមសាំង និងលោក ថោង សារឿន អតីតសកម្មជនគណបក្សសង្គ្រោះជាតិ បានបង្ហោះរូបថតនៅលើគណនីបណ្តាញសង្គម (Facebook) របស់ខ្លួនដោយមានសរសេរពាក្យពេចន៍ ដូចជា “ម្រាមដៃខ្ញុំពិតជាស្អាត ម្រាមដៃខ្ញុំត្រូវតែស្អាត បើគ្មានគណបក្សសង្គ្រោះជាតិ និងម្រាមដៃស្អាត”  ។ យុទ្ធនាការម្រាមដៃស្អាតនេះ ពិតជាមានផលប៉ះពាល់ដល់លទ្ធផលនៃការបោះឆ្នោត ហើយជាក់ស្តែង អត្រានៃអ្នកចេញទៅបោះឆ្នោតជ្រើសតាំងតំណាងរាស្រ្តមានចំនួន ៨៣,០២% ទាបជាងអត្រានៃអ្នកចេញទៅបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០១៧ ដែលមានចំនួន ៩០.៣៧% និងជាពិសេសសន្លឹកឆ្នោតខូចមានចំនួនរហូតដល់ជាង ៩% ដែលមិនធ្លាប់មានក្នុងប្រវត្តិនៃការបោះឆ្នោតនៅកម្ពុជា។

គ.ជ.ប មានសិទ្ធិពេញលេញក្នុងការអនុវត្តសមត្ថកិច្ចរបស់ខ្លួនស្របតាមរដ្ឋធម្មនុញ្ញ ច្បាប់ស្តីពីការបោះឆ្នោតជាធរមាន បទបញ្ជា និងនីតិវិធីសម្រាប់ការបោះឆ្នោតដែលកំណត់ដោយ គ.ជ.ប ៕

ចែករំលែក(Share)
មន្ត្រី​​​ទទួល​បន្ទុក​​គេហទំព័រ​៖ 096 69 09 778